İrandan Ayətullah Nimrlə bağlı Səudiyyə Ərəbistanına xəbərdarlıq

İran xarici işlər nazirinin müavini Hüseyn Əmirabdullahian Səudiyyə Ərəbistanında yaşayan  Əhli-Beyt (ə) alimi Ayətullah Nimr Baqir ən-Nimrin edam edilməsinin "pis nəticələr doğuracaq"ı ilə bağlı xəbərdarlıq edib.

Ahlibeeyt.az-ın Faktxeber-ə istinadən məlumatına görə, H.Əmirabdullahian deyib ki, əgər Əhli-Beyt (ə) alimi Ayətullah Nəmr Baqir ən-Nəmrə edam qərarının çıxarılması ilə bağlı xəbər düzgündürsə, heç şübhəsiz bu dünya müsəlmanlarını narahat edəcək və buna etirazlarını bildirəcəklər.

Əmirabdullahian deyib ki, bu kimi hərəkətlər regionda sülh və sabitliyin yaradılması yönündə atılmış bir addım kimi hesab olunmayacaq.

Xatırladaq ki, oktyabrın 14-də Səudiyyə rejim məhkəməsi Şeyx Nəmr haqqında edam qərarı qəbul edib. Ali-Səud rejimi tərəfindən həbsdə saxlanılan ruhaninin qardaşı Məhəmməd Ən-Nəmr bu faktı təsdiq edib və deyib ki, məhkəmə qərarından apelyasiya şikayəti veriləcək.

Ayətullah Şeyx Nəmr Səudiyyə Ərəbistanı şiələrinin tanınmış alimlərindən biridir. O, 8 iyul 2012 tarixində Səud rejimi tərəfindən həbs edilib.

Səudiyyə Ərəbistanı rejiminin bu istəyi yerli və beynəlxalq hüquq təşkilatları tərəfindən böyük etirazla qarşılanıb. Böyük müctəhidlər Səudiyyə Ərəbistanın bu istəyinə qarşı etiraz bəyanatları yayıblar.