Məşədi Dadaş məscidinin axundu, tanınmış ilahiyyatçı alim Hacı Şahin Həsənli Modern.az-a müsahibəsində bildirib ki, bir sıra ölkələrin qəbiristanlığında hətta uşaqların oynaması üçün müəyyən şərait yaradılıb.

“Dinimiz qəbir ziyarətini bizə ona görə tövsiyə edir ki, qəbiristanlıqda insan mənəvi bir hüzur tapmalıdır. Qəbiristanlıq insana axirət həyatını xatırlatmaldır. Axirətini xatırlayan insan isə dünyadakı çətinliklərini unudur. Dünya onun gözündə yüngülləşir”.
Onun fikrincə, qəbir daşlarının özündə dəyişiklik edilməlidir: “Hesab edirəm ki, qəbir daşlarında dəyişiklik edilməsi məqsədəuyğundur. Çünki qoyulan heykəllər, qara mərmərdən ucaldılan abidələr dini nöqteyi-nəzərdən də yanlışdır. İstər-istəməz qəbiristanlığa daxil olan insana mənfi təsir göstərir.  Əslində qəbiristanlıqda başdaşlarının qara mərmərdən, təmtaraqlı olmasına ehtiyac da yoxdur. Dini nöqteyi-nəzərindən bunların hamısı israf hesab olunur və günah sayılır.

Qəbirlərin üzərində yalnız rəhmətə gedən şəxsin kimliyini bildirən əlamət olmalıdır. Məncə, bu dəyişikliklər mütləq olmalıdır və insanlar əməli nümunə göstərməlidir.

Əksəriyyət qəbiristanlıqdakı dəbdəbədən narazılıq edir, amma öz yaxını vəfat edəndə özü də bunları təkrar edir və ümumi qaydadan kənara çıxmır, bahalı daşlardan istifadə edir.

Qəbir daşları da şan-şöhrət amilinə çevrildiyindən, insan hüzur tapa bilmir. Sanki qəbirlərimizlə də rəqabət aparırırq.Buna görə də qəbristanlığa gedərkən insanda bir xof, narahatlıq hissi yaranır”.