Medianın İnkişafı Agentliyi fərdi jurnalist müsabiqəsi elan edib.

Ahlibeyt.az-ın Agentliyə istinadən məlumatına görə, “Media haqqında” Azərbaycan Respublikası Qanununun 1.1.4-cü maddəsinə əsasən jurnalist anlayışı ilə əhatə olunan şəxslər müsabiqədə iştirak edə bilərlər.

Müsabiqədə iştirak etmək üçün müraciət və ona əlavə edilən sənədlər elektron formada mib.media.gov.az portalı vasitəsilə Azərbaycan Respublikasının Medianın İnkişafı Agentliyinə təqdim edilir.

Müsabiqənin yekununda yazılar üçün nəzərdə tutulmuş nominasiyaların hər biri üzrə 5 jurnalist, süjetlər üçün nəzərdə tutulmuş nominasiyaların hər biri üzrə isə 2 jurnalist və 2 operator qalib elan edilir və mükafatlandırılır.

Müraciət üçün son tarix 15 noyabrdır.

Müsabiqə barədə daha ətraflı məlumatı Agentliyin rəsmi internet saytından (media.gov.az) əldə etmək mümkündür.

Qeyd edək ki, Fərdi jurnalist müsabiqəsi Azərbaycan Respublikasının Medianın İnkişafı Agentliyi tərəfindən jurnalistlərin peşakarlıq və məsuliyyətinin artırılması, o cümlədən sosial müdafiəsinə yönəldilmiş tədbirlərin həyata keçirilməsi, media nümayəndələrinin fərdi bacarıqlarının təkmilləşdirilməsi, dövlət və cəmiyyət üçün prioritet təşkil edən məsələlərin həllində jurnalistlərin potensialından səmərəli istifadə olunması, jurnalist tədqiqatlarının aparılmasının stimullaşdırılması məqsədilə dövri olaraq həyata keçirilir.