Təhsildə Keyfiyyət Təminatı Agentliyinin (TKTA) nümayəndə heyəti Böyük Britaniyanın Qlazqo şəhərində təşkil olunan “Kvalifikasiyaların tanınması sahəsində yeni çağırışlar” adlı beynəlxalq konfransda ölkəmizi təmsil edib.

Ahlibeyt.az-ın xəbərinə görə, Agentliyin məlumatında bildirilib ki, konfransda Kvalifikasiyaların tanınması departamentinin direktoru Aysel Kərimli və Xarici kvalifikasiyaların tanınması şöbəsinin əməkdaşı Peyman Almasov iştirak ediblər.

Aysel Kərimli “Ən yaxşı təcrübələr və yeni yanaşma: xarici ölkələrin diplomlarının Azərbaycanda tanınması” mövzusunda çıxış edərək ölkəmizin ali təhsil sistemi, kvalifikasiyaların tanınması sahəsində əldə edilən nailiyyətlər barədə geniş məlumat verib və konfrans iştirakçılarının suallarını cavablandırıb.

Qeyd edək ki, Beynəlxalq Kvalifikasiyaları Qiymətləndirmə Mütəxəssisləri Assosiasiyasının (TAICEP) Şotlandiyanın Kvalifikasiyalar Agentliyinin dəstəyi ilə təşkil olunan konfransda 27 ölkənin ixtisaslaşmış təşkilatlarının və ali təhsil müəssisələrinin nümayəndələri iştirak edib.