İran İslam Respublikasının Azərbaycandakısəfiri Şərqşünaslıq İnstitutuna hədiyyə olunan kitabların təqdimatında iştirak edib.

Ahlibeyt.az-ın AMEA-nın saytına istinadən xəbərinə görə, səfir Seyid Abbas Musəvi və Səfirliyin Mədəniyyət Mərkəzinin sədri Əli Purmərcan AMEA-nın akademik Ziya Bünyadov adına Şərqşünaslıq İnstitutunda müəssisənin direktoru, akademik Gövhər Baxşəliyeva ilə görüşüb.

G.Baxşəliyeva Şərqşünaslıq İnstitutunun elmi istiqamətləri barədə məlumat verərək, iranşünaslıq sahəsində aparılan tədqiqatlardan, görkəmli alimlərimizin elmimizə bu sahədə verdikləri böyük töhfələrdən danışıb. Ölkələrimiz arasında elm və təhsil sahəsində əməkdaşlıq üçün geniş imkanların olduğunu deyən akademik bu cür görüşlərin hər iki tərəfin elmi əlaqələrinin genişlənməsinə böyük fayda verdiyini qeyd edib.

Seyid Abbas Musəvi Azərbaycan – İran əlaqələrindən danışaraq elmi əlaqələrin inkişaf etdirilməsinin əhəmiyyətini qeyd edib.

Daha sonra İran İslam Respublikasının Azərbaycandakı Səfirliyinin Mədəniyyət Mərkəzi tərəfindən Şərqşünaslıq İnstitutuna hədiyyə edilən kitabların təqdimatı olub. Gövhər Baxşəliyeva kitabları təqdim etdiklərinə görə İran İslam Respublikasının Azərbaycandakı səfiri Seyid Abbas Musəviyə və İran İslam Respublikasının Azərbaycandakı Səfirliyinin Mədəniyyət Mərkəzinin sədri Əli Purmərcana təşəkkürünü bildirərək, bu kitabların iranşünas alimlərin elmi tədqiqatları üçün faydalı olacağına əminliyini bildirib.