İyulun 25-də Qafqaz Müsəlmanları İdarəsinin konfrans zalında toplantı keçirilib. Qüds Günü ilə bağlı keçirilən tədbirdə QMİ Elmi-Dini Şurasının və Qazılar Şurasının üzvləri, dini icmaların rəhbərləri, Azərbaycanda fəaliyyət göstərən bir sıra müsəlman ölkələrinin səfirləri iştirak ediblər.

Ahlibeyt.az-in QMİ-nın rəsmi mətbu orqanı olan Qafqazislam-a istinadən verdiyi xəbərə görə Qafqaz Müsəlmanları İdarəsinin sədri, Şeyxülislam Allahşükür Paşazadə tədbirdə çıxış edərək diqqəti Qəzza zolağında baş verənlərə yönəldib. Şeyxülislam həzrətləri bildirib ki, Qəzzada yaşananlar ərazisi işğal olunan Azərbaycan xalqına tanışdır. Allahşükür Paşazadə dünya ictimaiyyətini Yaxın Şərqdə baş verənlərə doğru qiymət verməyə, faciəyə son qoymağa çağırıb.

Tədbirdə Qafqaz Müsəlmanları İdarəsinin bəyanatı oxunub və yekdilliklə qəbul edilib.

Mərasimin sonunda Şeyxülislamın adından iftar süfrəsi açılıb.

Şeyxülislam Allahşükür Paşazadənin tədbirdəki çıxışını diqqətinizə təqdim edirik:

Bismillahir-rəhmanir-rəhim!

Bizim zəmanəmizin özəlliyi ondan ibarətdir ki, tarixi baxımdan çox nadir bir dönəmdə - iki minilliyin və iki əsrin ortalarında yaşamaq bizlərə nəsib olmuşdur. Fəqət çox təəssüf edici haldır ki, XXI əsrin gəlişindən artıq 14 il keçməsinə baxmayaraq insanlığın ən böyük bəlası sayılan müharibələrdən, qanlı savaşlardan, zülm və istismar niyyətilə edilən qardaş qırğınlarından hələ də qurtula bilmirik.

Bu gün dünya xəritəsində qaynar nöqtələrin sayı sülh və rifah içində yaşayan dövlətlərin sayından qat-qat çoxdur. Xüsusilə bizim də ənənəvi olaraq daxil olduğumuz İslam dünyasında baş verən son hadisələr hər birimizi son dərəcə narahat edir. Çünki Qarabağ müharibəsinin, Xocalı soyqırımının, erməni ekstremistlərinin mütəmadi terrorunun acılarını yaşayan bir xalq kimi biz azərbaycanlılar İraq türkmənlərinin qətliamına, Suriyadakı qardaş qırğınlarına, hər gün terrorçu İŞİD-in törətdiyi rəzalətlərə və hərbi cinayətlərə laqeyd yanaşa bilmirik. Allah-Təalanın hökmü budur ki:

“Yer üzü (iman və ədalətlə) düzəldikdən sonra orada fəsad törətməyin” (“əl-Ərəf, 56”).

Amma bu gün vəziyyət elədir ki, bir sıra dövlətlərin, o cümlədən, Suriya, İraq, Fələstinin, həmçinin terrorun səngimədiyi Əfqanıstan, Pakistan, Liviya, Mali və digər müsəlman ölkələrinin müasir durumunu fəsad və faciələr tarixi adlandırmaq olar. Hər gün yüzlərlə müsəlman qətl edilir, uşaqlar yetim, analar ağlar qalır, qocalara, qadınlara rəhm edilmir. Müsəlman dünyasının nadir sənət inciləri, memarlıq abidələri, məscidlər, müqəddəs ziyarətgahlar, hətta xristian kilsələri, pravoslav və katolik məbədləri də bombalanır, yerlə yeksan olur. Ən qorxulusu isə odur ki, bu vəhşət içərisində yeni bir sosial fəlakət – bir-birinə nifrət edən, bir-birinin qanına susayan insanlar cəmiyyəti yaranır. Sözdə dünyanın qloballaşdığı, mədəniyyətlərin yaxınlaşdığı, elmin, tibbin, iqtisadiyyatın təkmilləşdiyi bir zamanda yaşayırıq. Amma reallıqda insanlar arasında milli, dini, irqi zəmində nifrət və qarşıdurma sayəsində  bəşəriyyət sonu görünməyən bir uçuruma gedir və təəssüf ki, bu qətliamın dayandırılması, hələ ki, mümkün deyildir.

Bu gün qeyd etdiyimiz Qüds  gününün hər il mübarək Ramazanın son cüməsində keçirilməsi təşəbbüsü İslam dünyasının görkəmli şəxsiyyəti, İranın mərhum Ali Dini Lideri, Ayətullahul-üzma Xomeyni həzrətlərinə aiddir ki, biz burada onu rəhmətlə yad edir, Allahdan əcrini diləyirik! Bildiyiniz kimi, əzəmət sahibi  peyğəmbərlərin vətəni Qüdsdə müsəlmanların ilk qibləsi sayılan Beytül-Müqəddəs məscidindən Xatəmül-ənbiya Peyğəmbərimiz (s) Meraca qalxmış və ilahi mükaliməyə vaqif olmuşdur. Qurani-Kərimdə  Rəsulullahın (s) mübarək bir gecədə Allah-Təalanın qüdrətilə Məkkədəki Məscidül-həramdan ətrafını mübarək etdiyi Məscidül-Əqsaya  aparılması barədə Qüdsü ehtiva edən  məşhur ayeyi-şərifi vardır: “Bəzi ayələrimizi göstərmək üçün bəndəsini bir gecə Məscidül-Həramdan ətrafını mübarək etdiyimiz Məscidül-Əqsaya aparan Allah pak və müqəddəsdir... ” (“əl-İsra, 1).

Fəqət o Qüds bu gün Qəzza üçün qan ağlayır. Bu mübarək Ramazanda Qəzzadakı qardaşlarımızın iftarı ölüm, imsakı qanlı göz yaşlarıdır. Qəzzadakı uşaqların hədiyyəsi oyuncaq deyil, avtomat güllələri və başlarına yağan fosforlu bombalardır. Bu gün Qəzzada İsrail hərbi qüvvələri, sionistlər və onların tərəfdarları tərəfindən törədilən qətllər nəinki müsəlmanları, ürəyində Allah rəhmi olan hər bir insanı, dilindən, irqindən, dinindən asılı olmayaraq hər bir bəşər övladını dəhşətə gətirir.

Biz İslam dünyasında baş verən savaşlar, qardaş qırğınları və təxribatlarla  əlaqədar bu yaxınlarda xüsusi bəyanat vermişik və müqəddəs Ramazan ayı ərzində savaşlara son qoyulması çağırışı etmişik. Bugünkü tədbirimizdə müsəlman ölkələri səfirlərinin iştirakına görə təşəkkür edirik və Qəzza ilə əlaqədar qəbul edəcəyimiz bəyanatın dünya ictimaiyyətinə, bütün dövlətlərə və cəmiyyətlərə ünvanlanmasını istəyirik. Məqsədimiz budur ki, dünyanın iqtidar gücündə olan dövlətləri, sülh yaratmağa səy göstərən beynəlxalq təşkilatları  və  bütün insanlar dərk etsinlər ki, Allah-Təalanın  bizim üçün yaratdığı bu dünyanı, sülh və əmin-amanlıq üçün bizə əmanət etdiyi bu cahanı hikmət və barışla xilas etməyin zamanı gəlmişdir. Necə ki, Qurani-Şərifdə buyurulur: “İnsanları hikmətlə, gözəl öyüd-nəsihət ilə Rəbbinin yoluna dəvət et”  (“əl-Nəhl”, 125).

Biz əminik ki, Rəbbimizin hidayət yolundan azaraq günahsız insanların qanını axıdanlar, terrora və qətliama haqq qazandıranlar, gec ya tez,  mütləq Uca Yaradanımızın və cəmiyyətin  qarşısında  cavab verəcəklər,  inşallah!

Vəssalamu əleykum və rəhmətullahi və bərəkatuh.