Peyğəmbərin(s) mövludu Bakıda möhtəşəm şəkildə qeyd edilib - Video

Dünyanın hər yerində olduğu kimi Azərbaycanda da İslam Peyğəmbəri Həzrət Məhəmmədin (s) mövlud tədbirləri təşkil olunub.

Ahlibeyt.az-ın verdiyi xəbərə görə, noyabrın 25-də Bakının "Məşədi Dadaş" məscidində möhtəşəm mövlud tədbiri keçirilib.

Mövlud gecəsinə din xadimləri - ilahiyyatçı hacı Şahin Həsənli, Qaraçuxur qəsəbə məscidinin imamı Qurban Əliyev, ilahiyyatçı Axund Azər Sani, tanınmış qari hacı Ruslan Qasımov, xalq artisti, Azərbaycan muğam sənətinin görkəmli ifaçısı Alim Qasımov, məşhur xanəndə Hüseyn Məlikov, yazıçı, şair və kinodramaturq İlqar Fəhmi, fəlsəfə doktoru Mail Yaqub, tanınmış qəzəlxan Arif Buzovnalı və digər qonaqlar qatılıblar. Tədbiri məscidin həyətində quraşdırılmış monitordan da izləmək mümkün olub.

Qeyd edək ki, Həzrət Məhəmmədin (s) mövlud məclisinə əhli - sünnə məzhəbindən olan Qaraçuxur məscidinin imamının dəvət olunması və onun məsciddə çıxış etməsi ölkədə məzhəblərarası vəhdətinin təbliğinə böyük töhvə verib.