İmam və qazıların həyat şəraiti daha da yaxşılaşdırılacaq

"Sentyabrın 1-dən etibarən din xadimlərinə verilən maddi yardımdan heç bir vergi tutulmadan təqdim olunur".

Ahlibeyt.az-ın Faktxeber-ə istinadən məlumatına görə, bunu Dini Qurumlarla İş üzrə Dövlət Komitəsinin sədri Mübariz Qurbanlı Məhərrəm ayının başlanması ilə əlaqədar keçirilən tədbirdə çıxışı zamanı deyib.

Onun sözlərinə görə, hazırda 1060-dan çox din xadimi müxtəlif formada maddi yardımlar alır: "Bu yardımlardan müəyyən sosial və vergi tutmaları tətbiq edilirdi. Dövlət başçısı bunu bildikdə vergi tutulmasının dayandırılması barədə tapşırıq verdi. Bu səbəbdən sentyabrın 1-dən sosial və vergi tutulması dayandırılır".

M.Qurbanlı bildirib ki, sentyabrın 1-dən din xadimləri maddi dəstəyi kartlarına yazıldığı qədər tam məbləğdə alacaqlar: "Dövlətimiz məscidlərdə işləyən imam və qazıların həyat şəraitinin yaxşılaşdırılması üçün əlavə tədbirlərin keçirilməsini nəzərdə tutur. Yəqin ki, yaxın aylarda bunu görəcəyik".