Kriminal hadisələr media vasitəsilə ictimaiyyətə təsirini göstərir: "Kriminal xəbərlərin yayımlanması ilə gizli cinayətlərin sayı çoxalmağa başlayır

Ahlibeyt.az-ın Salamnews-a istinadən xəbərinə görə, bunu Mətbuat Şurasının (MŞ) sədri Əflatun Amaşov Şuranın təşkilatçılığı ilə “Mediada kriminal hadisələrin işiqlandırılması: İctimai maraqlar və peşəkarlıq” mövzusunda keçirilən dəyirmi masada deyib.

F.Amaşov qeyd edib ki,"Dağlıq Qarabağ”, “Bakı – Tbilisi – Qars (BTQ) dəmiryolu”, “Fədayə Laçın” və “Qoca” ləqəbli kriminal avtoritet” sözlərini axtarışa verdik. Birinci yerdə “Fədayə Laçın”, ikinci yerdə “Dağlıq Qarabağ”, üçüncü yerdə “Qoca”, dördüncü yerdə “Bakı-Tbilis-Qars dəmiryolu” ifadələri yer almışdı. Bu, Azərbaycan mətbuatının mənzərəsini göstərən vəziyyətdir.

O bildirib ki, kriminal hadisələr media vasitəsilə ictimaiyyətə təsirini göstərir: "Kriminal xəbərlərin yayımlanması ilə gizli cinayətlərin sayı çoxalmağa başlayır, cəmiyyətdə sosial gərginlik artmış olur, tolerantlıq azalır. Belə ki, kriminal xəbərlərdə cinayətkarlar qəhrəman kimi  təqdim olunur. Cinayətkarların "romantikcəsinə" təbliğ olunması nəticəsində cəmiyyətdə yeniyetmələrin hüquqi prosesə qoşulmasında əngəllər yaranır. Kriminal xəbərlərin fonunda ən qorxulusu hüquq-mühafizə orqanları əməkdaşlarının düşmən obrazının yaradılmasıdır. Eyni zamanda, informasiyalar şişirdilir, cəmiyyətdə qorxu, xof yaradılır. Biz nəyə görə cinayətkarları qəhrəmanlaşdırırıq?!”, - deyə MŞ sədri bildirib.