Qəbələ şəhər Cümə məscidi dini icması maarifləndirici tədbir keçirib

Oktyabrın 27-də Dini Qurumlarla İş üzrə Dövlət Komitəsinin dəstəyi ilə Qəbələ şəhər dindarlarının məscidi dini icmasının həyata keçiridiyi “İslam həmrəylik dinidir” layihəsi çərçivəsində növbəti tədbir keçirilib.

Ahlibeyt.az-ın dövlət komitəsinin mətbuat xidmətinə istinadən məlumatına görə, Qəbələ Regional QHT-lərin Resurs və Təlim Mərkəzində təşkil edilən tədbirdə Dini Qurumlarla İş üzrə Dövlət Komitəsinin (DQİDK) Şəki bölgəsi üzrə şöbəsinin əməkdaşı Zaman Şirinov, Qəbələ Rayon İcra Hakimiyyəti başçısı Aparatının İctimai-siyasi və humanitar məsələlər şöbəsinin müdi müavini - dini qurumlarla işin təşkilatçısı Absalam Hüseynov, Resurs ve Təlim Mərkəzininin direktoru Anar Məhərrəmov, Qəbələ şəhər Cümə məscidi dini icmasının üzvü Laçın Ağalarov, gənclər və ictimaiyyət nümayəndələri iştirak ediblər.

Tədbiri giriş sözü ilə açan Qəbələ Regional QHT-lərin Resurs ve Təlim Mərkəzininin direktoru Anar Məhərrəmov layihəni yüksək qiymətləndirərək bu istiqamətdə davam edən maarifləndirici tədbirlərin əhəmiyyətindən danışıb.

DQİDK-nın Şəki bölgəsi üzrə şöbəsinin əməkdaşı Zaman Şirinov Azərbaycanda dövlət-din münasibətlərindən, müsəlman aləmində, eləcə də dünyada sabitliyin və dayanıqlı sülhün təmin edilməsi üçün İslam həmrəyliyinin, millətlər və dinlərarası dialoqun inkişaf etdirilməsinin vacibliyindən danışıb.

Daha sonra çıxış edən dini icmanın üzvü Laçın Ağalarov qeyri-ənənəvi radikal dini cərəyanların zərərləri haqqında danışıb, onlarla mübarizədə ənənəvi dini dəyərlərin inkişafının əhəmiyyətini xüsusi vurğulayıb.

Sonda Dövlət Komitəsinin sifarişi ilə çəkilən “Şəhadət” sənədli filminin nümayişi olub.