• Azərbaycanda

Müfti Usmonxan Alimov - Bəzi qüvvələr İslam dininə qarşı düşmən münasibət formalaşdırmağa çalışır

Azərbaycan və özbək xalqlarını ortaq dəyərlər birləşdirir. Etnik baxımdan qohum xalqlarımız həm də, eyni dinə inanır. Özbək xalqı da Azərbaycan xalqı kimi, azadlıq mübarizəsi aparıb, çoxsaylı şəhidlər verib.

Ahlibeyt.az-ın AZƏRTAC-a istinadən məlumatına görə, bu sözlər iyulun 11-də Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə ilə Özbəkistan Respublikasının Nazirlər Kabineti yanında Dini Məsələlər üzrə Dövlət Komitəsinin sədri Artukbek Yusupov və Özbəkistan Müsəlmanları İdarəsinin sədri, müfti Usmonxan Alimov arasında keçirilən görüşdə səsləndirilib.

QMİ-nin sədri Şeyxülislam Allahşükür Paşazadə vurğulayıb ki, Azərbaycan və özbək xalqları arasında tarixi köklərə malik əlaqələr mövcuddur. Bu əlaqələr XX əsrin sonlarında hər iki ölkənin dövlət müstəqilliyinə yenidən qovuşmasından sonra daha da inkişaf edərək strateji tərəfdaşlıq səviyyəsinə yüksəlib. Özbəkistan hər zaman Azərbaycanın haqq işini dəstəkləyib. A.Paşazadə Özbəkistan ilə Azərbaycan arasında tarixi kökləri olan dostluq münasibətlərinə toxunaraq deyib ki, ölkələrimiz arasında əlaqələrin əsası ulu öndər Heydər Əliyev tərəfindən qoyulub. Şeyxülislam deyib ki, bu gün bütün dünyada dini və milli zəmində ekstremizm, ksenofobiya, islamofobiya, radikalizm, terrorizm təzahürləri tüğyan edir. Belə bir vaxtda müsəlman xalqları bir-birlərinin arxasında möhkəm durmalı, həmrəylik nümayiş etdirməlidirlər.

Özbəkistanın Mərkəzi Asiya regionunda böyük nüfuza malik dövlət olduğunu deyən A.Paşazadə bu ölkənin dini təhsil sahəsində də uğurlar əldə etdiyini diqqətə çatdırıb. Belə ki, Özbəkistanın müxtəlif dini təhsil ocaqlarını bitirən alimlər bu gün dünyanın bir sıra ölkələrində, o cümlədən Azərbaycanda İslamın düzgün çatdırılması və təbliği işini uğurla yerinə yetirirlər.

Özbəkistan Müsəlmanları İdarəsinin sədri, müfti Usmonxan Alimov Azərbaycan və özbək xalqları arasında qədim tarixə malik mədəni, dini-mənəvi əlaqələrin bugünkü inkişaf səviyyəsindən məmnunluq ifadə edib. O, səfər zamanı aparılan müzakirələrin xalqlarımız arasında dini sahədə əlaqələlərin inkişafına müsbət təsir göstərəcəyinə əmin olduğunu bildirib. Usmonxan Alimov qeyd edib ki, Azərbaycanda məzhəblərarası həmrəyliyin nadir nümunəsi mövcuddur. Hazırda bəzi qüvvələr İslam dininə qarşı düşmən münasibət formalaşdırmağa çalışır. Lakin İslam dininə münasibətdə bu cür yanaşma əsassızdır və bu, İslam dəyərlərinin yanlış dərk edilməsindən irəli gəlir.

Özbəkistan Respublikasının Nazirlər Kabineti yanında Dini Məsələlər üzrə Dövlət Komitəsinin sədri Artukbek Yusupov bildirib ki, iki qardaş ölkə arasında əlaqələrin dərin tarixi kökləri var. Bütün sahələrdə olduğu kimi din sahəsində də iki ölkə arasında əlaqələr yüksələn xətlə inkişaf edir. Prezident İlham Əliyevin din sahəsində həyata keçirdiyi siyasəti yüksək dəyərləndirən A.Yusupov Azərbaycanın nadir tolerantlıq mühiti ilə seçildiyini bildirib. Vurğulayıb ki, Azərbaycanda insanların milli-mənəvi dəyərlərə bağlılığı, ölkəmizdə dini etiqad azadlığının təmin edilməsi, dövlət-din münasibətlərinin yüksək səviyyədə olması təqdirəlayiqdir.

Saytın materiallarından istifadə edərkən istinad vacibdir!

12 İyul, 2017 13:41 ⁄ Çap