Ölkə məscidlərində 4 iyul erməni təxribatı qurbanlarının xatirəsi yad olunub - Video

Qafqaz Müsəlmanları İdarəsinin sədri Şeyxülislam Allahşükür Paşazadənin göstərişi ilə iyulun 7-də paytaxt Bakıda və respublikanın bütün bölgələrindəki məscidlərdə, habelə İdarənin xaricdəki səlahiyyətli nümayəndəliklərinin fəaliyyət göstərdiyi yerlərdə Cümə namazı zamanı 4 iyul erməni təxribatı qurbanlarının - qətlə yetirilmiş dinc Füzuli sakinlərinin xatirələri yad olunub, onların şəninə müqəddəs Qurani Kərimdən ayələr oxunub, ruhları üçün dualar edilib.

Din xadimləri cümə xütbələrində erməni vandalizminin növbəti təzahürü olan 4 iyul təxribatı - dinc əhaliyə qarşı mütəmadi törədilən, qadın, uşaq və qocaların qətlləri barədə moizələr ediblər. Həmçinin idarənin xaricdəki səlahiyyətli nümayəndələri fəaliyyət göstərdikləri ölkələrin ictimaiyyətinə xalqımıza qarşı təcavüzün, erməni vəhşiliklərinin mahiyyəti barədə həqiqətləri çatdırıb.

Ölkənin bütün ibadət ocaqlarında olduğu kimi Sumqayıt şəhər “Cümə” məscidində də 4 iyul erməni təxribatı nəticəsində həlak olmuş balaca Zəhra və onun nənəsinin xatirəsi anılıb. Bildirilib ki, bu bir daha erməni vəhşiliyinin baris nümunəsidir.

Cümə namazı zamanı 4 iyul erməni təxribatı nəticəsində həlak olmuş Füzuli sakinlərinin xatirələri yad olunub, onların şəninə müqəddəs Qurani Kərimdən ayələr oxunub, ruhları üçün dualar edilib.

Qeyd edək ki, iyulun 4-də saat 20:40 radələrində Ermənistan silahlı qüvvələri tərəfindən Füzuli rayonunun Alxanlı kəndi 82 və 120 millimetrlik minaatanlardan və dəzgahlı qumbaraatanlardan atəşə tutulub.

Ermənistan tərəfinin bu təxribatı nəticəsində kənd sakinləri - 1967-ci il təvəllüdlü Quliyeva Sahibə İdris qızı və onun nəvəsi, 2015-ci il təvəllüdlü Quliyeva Zəhra Elnur qızı həlak olublar.

1965-ci il təvəllüdlü Quliyeva Sərvinaz İltifat qızı isə yaralanıb.

İnteraz.az