İyunun 7-də Dini Qurumlarla İş üzrə Dövlət Komitəsində (DQİDK) layihələri maliyyələşdirilmiş dini icma sədrlərinin iştirakı ilə tədbir keçirilib.

Ahlibeyt.az-ın Dini komitənin mətbuat xidmətinə istinadən məlumatına görə,tədbirdə Dövlət Komitəsi sədrinin birinci müavini, Aparat rəhbəri, şöbə müdirləri və dini icmaların rəhbərləri iştirak ediblər.

Dövlət Komitəsi sədrinin birinci müavini Səyyad Salahlı Prezident İlham Əliyevin ölkədə dini maarifləndirmə və milli-mənəvi dəyərlərin təbliği işini daha da gücləndirmək məqsədilə dini icmalara maliyyə yardımı göstərmək üçün imzaladığı müvafiq Sərəncamın önəmindən də danışıb.

Səyyad Salahlı dövlətin daim dindarların və dini icmaların yanında olduğunu, mütəmadi olaraq dini icmaların layihələrinin maliyyələşdirildiyini vurğulayıb. O, ölkəmizdəki sabitliyin və əmin-amanlığın qorunub saxlanılmasında din xadimlərinin fəaliyyəti ilə bağlı ümumi prinsipləri qeyd edərək, Ramazan ayında bu fəaliyyətin daha mütəşəkkil formada davam etdirilməsinin vacibliyini qeyd edib.

Eyni zamanda, Səyyad Salahlı dini icma sədrlərinə rəhbərlik etdikləri icmaların milli-mənəvi dəyərlərimizin təbliği və radikalizmə qarşı mübarizə istiqamətində fəaliyyət göstərmələrini, ümummilli maraqlardan çıxış etmələrini tövsiyə edib.

Layihələri maliyyələşdirilən  Lənkəran rayonu Osakücə kənd məscidi dini icması “İslam həmrəyliyi müasir dövrün çağırışıdır”, İmişli rayonu Şahverdili kəndi “Əhli-Beyt” məscidi dini icması “Milli-mənəvi dəyərlərimiz və müasirlik”, Goranboy rayonu Xanqərvənd kənd məscidi dini icması “İslam Həmrəyliyinin Azərbaycanda sülhün qorunmasındakı əhəmiyyəti”, Sabirabad rayonu Həşimxanlı kənd məscidi dini icması “Multikultural cəmiyyətdə tolerantlıq ənənələrinin qorunması”, Şəki rayonu Aydınbulaq kəndi “Hacı Mir Ələkbərağa” məscidi dini icması “İslam dini sülh, həmrəylik və vəhdət dinidir”,  Lerik rayonu Ləmərud kənd məscidi dini icması   “İslam – sülhə və həmrəyliyə aparan yoldur”, Quba şəhəri “Ərdəbil” məscidi dini icması “Ənənəvi İslam və həmrəylik”, Lənkəran rayonu Balıqçılar qəsəbəsi “Xanım Zəhra” məscidi dini icması “İslam həmrəyliyi sülh və inkişafa təminatdır”,  Masallı rayonu Köhnə Alvadı kənd məscidi dini icması “İslam həmrəyliyi radikalizm və ekstremizmə qarşıdır”, Masallı rayonu Köçəkli kənd məscidi dini icması “Dinimiz və mənəvi dəyərlərimiz”, Şəki rayonu Kiçik Dəhnə kənd məscidi dini icması “Cəmiyyətimizi radikal dini təsirlərdən qoruyaq”, Yardımlı rayonu Avaş kəndi “İmam Museyi Kazım” məscidi dini icması “Radikal meyillərə qarşı mübarizədə dindarların rolu”, Abşeron rayonu Güzdək qəsəbəsi “Rəsulullah” məscidi dini icması “İslam həmrəyliyi – dini radikalizmdən xilas yolu”, Balakən rayonu Cederovtala kənd məscidi dini icması “İslam sülh və həmrəylik dinidir”, Xaçmaz rayonu Yalama kənd məscidi dini icması “Birliyimiz həmrəyliyimizdədir”, Sumqayıt şəhəri “Cümə” məscidi dini icması “İslam həmrəyliyi – düşüncə tariximizin dünəni və bu günü”, Ağdam rayonu Xındırıstan kənd məscidi dini icması “Heydər Əliyev irsi və İslam həmrəyliyi”, Ağcabədi şəhəri "Cümə" məscidi dini icması “Cəmiyyətdə tolerantlıq ənənələrinin qorunması”, Zaqatala rayonu Yengiyan kənd məscidi dini icması “İslam dininin mədəniyyətimizdəki yeri və rolu”, Lənkəran rayonu Bəlləbur kənd məscidi dini icması “İslam həmrəyliyi sülh və birliyə töhfə kimi” adlı maarifləndirmə tədbirləri həyata keçirəcəklər.

Dini icma sədrləri çıxış edərək dini sahəyə göstərdiyi diqqət və qayğıya görə Prezident İlham Əliyevə təşəkkürlərini bildiriblər.

Qeyd edək ki, Prezident İlham Əliyevin 27 noyabr 2014-cü ildə imzaladığı Sərəncama uyğun olaraq, Dini Qurumlarla İş üzrə Dövlət Komitəsi tərəfindən 216 dini icmanın layihələri maliyyələşdirilib ki, bunlardan 19-u qeyri-islam, 197-i isə İslam dini icmasıdır. DQİDK-ya təqdim etdikləri layihələri maliyyələşdirilmiş icmalar tərəfindən vəsait hesabına dini maarifləndirmə və milli-mənəvi dəyərlərimizin təbliği, gənclərin dini radikal təsirlərdən qorunması istiqamətində Bakı şəhərində və respublikanın regionlarında müxtəlif tədbirlər həyata keçirilir, kitablar çap edilir.