“Gənclər İnternetdə Nifrət Nitqinə Qarşı” mövzusunda konfrans keçirilib

Gənclər Təşkilatları Milli Şurası tərəfindən Step İT Akademiyasının tərəfdaşlığı ilə “Nifrət Nitqinə Yox Hərəkatı” Kampaniyası çərçivəsində “Gənclər İnternetdə Nifrət Nitqinə Qarşı” mövzusunda konfrans keçirilib. Konfrans bir sıra informasiya kommunikasiya mütəxəssisləri, gənclər təşkilatlarının nümayəndələri və fəal gənclərin iştirakı ilə baş tutub.

Ahlibeyt.az-ın Salamnews-a istinadən verdiyi xəbərə görə, tədbir gənclərin internetdən təhlükəsiz istifadəsi və onlayn nifrət nitqi ilə mübarizə metodları mövzusunda maarifləndirilməsi məqsədilə həyata keçirilir. Tədbirdə spiker qismində “AzEduNet” şirkətinin direktoru Renat Vitkalov, "Kaspersky Lab" şirkətinin Azərbaycan nümayəndəliyinin rəhbəri Müşfiq Məmmədov, "Microsoft Azərbaycan" şirkətinin nümayəndəsi Emin Axundov və İnformasiya Təhlükəsizliyi üzrə ekspert Vüsal Salmanlı iştirak ediblər.

Konfransda gənclərin internetdən düzgün istifadə qaydaları, sosial şəbəkələrdə insan hüquqlarının qorunması və nifrət nitqinə qarşı onlayn mübarizə mövzusunda müzakirələr keçirilib. Konfransın davamında yeniyetmə və gənclər arasında təhlükəsiz internet davranışının formalaşması, kibercinayətkarlıq, internetdə insan hüquqlarının pozulması və onunla mübarizə metodlarından danışılıb.

Müzakirələr zamanı əhatə olunan mövzularla bağlı gənclər tərəfindən səsləndirilən fikirlər əsasında təkliflər paketi hazırlanıb. Hazırlanan təkliflər paketi müvafiq dövlət qurumuna təqdim olunacaqdır.

Gənclər Təşkilatları Milli Şurasının sədri Seymur Hüseynov deyib: “Müasir dünyada internet gündəlik heyatımızın vacib hissəsinə çevrilib. Biz sevinirik ki, gənclərimiz İKT sahəsi ilə dərindən maraqlanır, kibertəhlükəsizlik məsələlərinə ciddi yanaşmağa başlayır. Kibercinayətkarlığın adi cinayətkarlıqla heç bir fərqi yoxdur. Bir insanın şərəf və ləyaqətinə, hisslərinə "Facebook"-da toxunmaq, real həyatda bunu etməklə eynidir. İnternetdən daha məsuliyyətli istifadə edilməsi, internetdə nifrət nitqinə yol verilməməsinin təbliğ edilməsi məhz "Nifrət Nitqinə Yox" Kampaniyasının əsas vəzifəsidir”.

Bildirək ki, 7 fevral dünyada Daha Təhlükəsiz İnternet Günü kimi qeyd olunur. Bu gün informasiya kommunikasiya texnologiyaları respublikamızın davamlı və dayanıqlı inkişafının təmin edilməsində və intellektual potensialının gücləndirilməsində əlverişli vasitə olaraq qəbul edilir.

Xatırladaq ki, “Nifrət Nitqinə Yox Hərəkatı” kampaniyası Avropa Şurası tərəfindən Gənclər Sektorunda prioritet təşəbbüs kimi reallaşdırılmağa başlayıb. “Nifrət Nitqinə Yox Hərəkatı” gənclərin onlayn nifrət nitqinə qarşı mübarizə kampaniyasıdır. 2013-cü ildən Gənclər Təşkilatları Milli Şurası “Nifrət Nitqinə Yox Hərəkatı” kampaniyasına qoşulub və bu çərçivədə bir sıra fəaliyyətlər həyata keçirib.