ATƏT-in Minsk qrupu Azərbaycan hərbçisinin meyitinin dərhal vətənə qaytarılmasına çağırır

ATƏT-in Minsk qrupunun Fransa, ABŞ və Rusiyadan olan həmsədrləri Ermənistanı Azərbaycan hərbçisinin meyitini dərhal vətənə qaytarmağa çağırır.

Ahlibeyt.az-ın Trend-ə istinadən məlumatına görə, bu barədə təşkilatın rəsmi saytında yayılan bəyanatda deyilir.

Bəyanatda bildirilir ki, atəşkəs rejiminin pozulması qəbuledilməzdir və həmsədrlər tərəfləri vəziyyətin sabitləşməsi üçün zəruri tədbirlər görməyə çagırır.

Qeyd edək ki, dekabrın 29-da səhər saatlarında Ermənistan Silahlı Qüvvələrinin kəşfiyyat qrupu Azərbaycan-Ermənistan dövlət sərhədini pozmağa cəhd göstərərkən bölmələrimizin pusqusuna düşüb. Döyüş toqquşması zamanı düşmən tərəfi canlı qüvvə sarıdan xeyli itki verərək geri çəkilməyə məcbur edilib. Hadisə nəticəsində Silahlı Qüvvələrimizin hərbi qulluqçusu, əsgər Qurbanov Çingiz Salman oğlu itkin düşüb.