Biləsuvar rayonunda  Azərbaycanın Milli Qəhrəmanı  Mübariz İbrahimovun  doğum günü  qeyd olunub.

 

Ahlibeyt.az-ın Apa-ya istinadən məlumatına görə, Biləsuvar Rayon İcra Hakimiyyətinin (RİH) məsul işçiləri və  ictimaiyyətin nümayəndələri rayonun Əliabad kəndində yerləşən ata ocağında Milli Qəhrəmanın evini ziyarət edərək ailəsi ilə görüşüblər.

 

Biləsuvar RİH başçısının birinci müavini Xanlar Məmmədov  Milli Qəhrəman Mübariz İbrahimovun həyatından və torpaqlarımızın müdafiəsi uğrunda göstərdiyi şücaətdən danışıb. Qeyd olunub ki, Mübarizin qəhrəmanlığı nəinki Azərbaycanda, bütün  dünyada böyük əks-səda doğurub.

 

Bildirilib ki, hər bir azərbaycanlı Milli Qəhrəmanın zəngin həyat yolu ilə fəxr edir. Azərbaycanın müstəqilliyinin və ərazi bütövlüyünün qorunub saxlanılmasında müstəsna xidmətinə və göstərdiyi rəşadətə görə  Azərbaycan prezidentinin sərəncamı ilə Mübariz İbrahimova ölümündən sonra Azərbaycanın Milli Qəhrəmanı adı verilib. Prezidentin digər bir sərəncamı ilə Mübariz İbrahimovun xatirəsi əbədiləşdirilib, Biləsuvar şəhərindəki  Lisey-Məktəb Kompleksi, eyni zamanda Biləsuvar rayonunun mərkəzi küçələrindən biri onun adını daşıyır.

 

Tədbirdə səslənən çıxışlarda bu gün hər bir  gəncin  Mübariz qəhrəmanlığından  örnək aldığı, nümunə götürdüyü qeyd olunub.

Milli Qəhrəmanın atası Ağakərim  İbrahimov   onların ailəsinə göstərilən yüksək diqqət və qayğıya görə ölkə başçısına təşəkkürünü çatdırıb.

Sonda tədbir iştirakçıları Azərbaycanın Milli Qəhrəmanı Mübariz İbrahimova  məxsus müxtəlif şəkillər, haqqında yazılmış kitablar, jurnallar və qəzetlərdən ibarət guşə ilə tanış olublar.