Azərbaycan Milli Elmlər Akademiyasının Tarix İnstitutu və Yasamal rayonundakı 20 Yanvar şəhidi Eldar Məmmədov adına 21 nömrəli tam orta məktəbin birgə təşkilatçılığı ilə “Tarixi şəxsiyyətlərimizə sahib çıxaq” layihəsi çərçivəsində “Şah Təhmasib Səfəvi” mövzusunda konfrans keçirilib.

Ahlibeyt.az-ın verdiyi xəbərə görə,Tarix İnstitutunun mətbuat xidmətinin rəhbəri Nazim Xəlilovun Karabakhmedia.az-a verdiyi məlumatda bildirilir ki,21 nömrəli tam orta məktəbdə keçirilən konfransda lahiyənin rəhbəri, Tarix İnstitutunun direktoru, AMEA-nın müxbir üzvü, Milli Məclisin deputatı Yaqub Mahmudov geniş çıxışında dövlətçilik tariximizdən, tarixi şəxsiyyətlərimizdən, tarixdə mövcud olmuş imperiyalarımızdan söz açmışdır.

O, qeyd edib ki,Azərbaycanın 5 min illik dövlətçilik tarixi var: “Azərbaycan xalqının tarixi şəxsiyyətləri və imperiyaları olmadan dünya tarixini təsəvvür etsək, tarix çox kasıb görünər. Xalqımız orta əsrlərin böyük dövlətlərini – Ağqoyunlu, Səfəvilər, Əfşarlar, Qacarlar imperiyalarını yaratmışdır”.

Tarixçi-alim Y.Mahmudov Səfəvi hökmdarı Şah Təhmasib (1524-1576) haqqında konfrans iştirakçılarına ətraflı məlumat verdi. O, qeyd etdi ki, Şah Təhmasib 235 illik Səfəvi imperiyasının yaradıcısı Şah İsmayıl Səfəvinin oğludur: “Şah İsmayıl, Şah Təhmasib, Şah Abbas və digər Səfəvi hökmdarlarının həyata keçirdikləri uğurlu daxili və xarici siyasət nəticəsində Səfəvi dövləti Yaxın və Orta Şərqin ən qüdrətli imperiyalarından birinə çevrildi”.

Yaqub Mahmudov çıxışında bildirdi ki, tarixinə sahib çıxan xalq məğlubedilməzdir: “Şagirdlər, Müstəqil Azərbaycanın gələcəyi sizlərin əlindədir”.

Tarixçi-alimlər tərəfindən konfransda vurğulanıb ki, Şah Təhmasib Səfəvi-Osmanlı müharibələrində sülhə nail olub və o, Avropa elçilərinin Osmanlı dövlətinə qarşı birləşərək müharibə etmək haqqında diplomatik təkliflərini rədd edib.

Şah Təhmasib Səfəviyə həsr olunmuş konfransda daha sonra lahiyənin təşkilat komitəsinin sədri Araz Şamil, tarixçi-alimlər Tofiq Nəcəfli, Zabil Bayramlı, Dilavər Əzimli, Yasamal rayon İcra Hakimiyyəti Başçısının müavini Təravət Muradova, Bakı şəhər Təhsil İdarəsinin nümayəndəsi Firudin Abbasov, 21 nömrəli tam orta məktəbin direktoru Ceyhun Bayramlı və başqaları çıxış etmişlər.

Qeyd edək ki, “Tarixi şəxsiyyətlərimizə sahib çıxaq” layihəsi çərçivəsində konfranslar 2015-ci ilin aprelindən keçirilir. Ötən müddət ərzində müxtəlif orta məktəblərdə layihə çərçivəsində Ulu öndər Heydər Əliyev, Şah İsmayıl Səfəvi, Ağa Məhəmməd şah Qacar və Nadir şah Əfşara həsr olunmuş konfranslar keçirilib.