İslam.az “Ramazana doğru” tədbiri keçirib

Mayın 2-də, Həzrət Əlinin (ə) mövlud günü, Gəncliyə Yardım Fondunun Hacı Zeynalabidin Tağıyev adına akt zalında müqəddəs 3 ayların (Rəcəb, Şaban və Ramazan) başlaması münasibəti ilə Dini Araşdırmalar Mərkəzinin dəstəyi ilə islam.az portalının təşkil etdiyi “Ramazana doğru” adlı tədbir keçirilib.

Ahlibeyt.az-ın İslam.az-a istinadən vedridiyi xəbərə görə, tədbir Quran tilavəti ilə başlayıb.

Dini Araşdırmalar Mərkəzinin icraçı direktoru Natiq Rəhimov qonaqları salamlayıb və təmsil etdiyi təşkilatın 1997-ci ildən başlayan çoxşaxəli fəaliyyəti barədə qısaca məlumat verib.

Daha sonra isə islam.az portalının baş redaktoru Vüsal Əliyev təmsil etdiyi KİV barədə danışıb, fəaliyyətinin əsas istiqamətləri və prioritetlərinə toxunub.

Ardından Natiq Rəhimov, “İrfan” jurnalının baş redaktoru Nurlan Məmmədov və “Məşədi Dadaş” məscidinin imam-cüməsi Hacı Şahin Həsənli müqəddəs 3 aylar barədə ətraflı danışaraq, bu aylarda olan əlamətdar hadisələr, onların əhəmiyyəti və bu ayların xüsusi ruhiyyəsi, Rəcəb, Şaban və Ramazanın fəzilətləri, əməlləri və özəllikləri, ümmətin müasir durumu barədə toplaşanları məlumatlandırıblar. Hər üç ilahiyyatçı hazırda ümmətin ən böyük ehtiyacının vəhdət olduğunu önə çəkərək, müsəlmanları ümumi dəyərlər ətrafında birləşməyə çağırıblar.

GYF-nin vitse-prezidenti Salman Əliyev çıxış edərək belə mötəbər tədbirə ev sahibliyi etdiklərinə görə qürur duyduğunu söyləyib.

Daha sonra ilahiyyatçılar qonaqların suallarını cavablandırıblar.

Samir Salamın ifasında ilahi nəğmələri toplaşanlar alqışlarla qarşılayıblar.

Müzakirələr və ünsiyyət çay süfrəsi ətrafında davam edib. Bununla da tədbir başa çatıb.