Qafqaz Müsəlmanları İdarəsinin sədri Şeyxülislam Allahşükür Paşazadə Azərbaycanda səfərdə olan Avropa İttifaqının Cənubi Qafqaz və Gürcüstandakı böhran üzrə xüsusi nümayəndəsi Herbert Salberin rəhbərlik etdiyi nümayəndə heyətini qəbul edib.

Ahlibeyt.az-ın verdiyi xəbərə görə, QMİ  mətbuat xidmətinin məlumatda bildirilir ki,Şeyxülislam Allahşükür Paşazadə görüş zamanı  Azərbaycanda dövlət-din münasibətlərindən və mövcud dini tolerantlıq ənənələrindən danışaraq deyib ki, ölkəmizdə müxtəlif konfessiyaların və icmaların nümayəndələri uzun əsrlər boyu dinc yanaşı yaşayıblar. Heç vaxt ksenofobiya və dini zəmində münaqişələr müşahidə olunmayıb. A.Paşazadə deyib: “Qanunlarımız digər azadlıqlarla bərabər, dini etiqad azadlığına da təminat verir. Burada məbədlər tikilir və bərpa edilir.

QMİ sədri Qafqazdakı vəziyyətlə bağlı narahatlığını diqqətə çatdıraraq bildirdi ki, bu yaxınlarda Ermənistan qondarma “erməni soyqırımının” 100 illiyini qeyd edib, halbuki onun özü təcavüzkardır və Azərbaycanın yeddi rayonunu işğal edib, erməni ekstremistləri Xocalı soyqırımını həyata keçiriblər. Qarabağ münaqişəsi həll olunmayana qədər Qafqazda sülhdən danışmaq olmaz.

Səmimi qəbula görə təşəkkür edən H.Salber dini liderlərin Dağlıq Qarabağ münaqişəsinin həllində nə kimi rol oynadıqları və perspektivdə onların rolunu gücləndirmək üçün nə etmək lazım gəldiyi ilə maraqlandı. Qonağın fikrincə, dini icmalar və onların rəhbərləri bu məsələdə daha fəal olmalıdırlar.

Şeyxülislam, öz növbəsində, QMİ-nin Dağlıq Qarabağ münaqişəsinin başlandığı dövrdən etibarən konfliktin dini qarşıdurma müstəvisinə keçməməsi məqsədilə 1988-ci ildən başlayaraq Rus Pravoslav Kilsəsinin və Ümumdünya Kilsələr Şurasının vasitəçiliyilə erməni dini rəhbərliyilə dəfələrlə keçirdiyi görüşlər, əldə olunmuş razılaşmalardan irəli gələn məqamlarla bağlı gerçəkləşdirdiyi tədbirlər haqqında qonağı məlumatlandırdı. O bildirdi ki, erməni dini liderlə vaxtilə imzalanmış birgə bəyannamələrə əməl edərək əsirlərin və meyidlərin qaytarılması yönündə etdiyi jestlər, təəssüf ki, birtərəfli olmuş və ermənilər tərəfindən qarşılıq göstərilməmişdir. QMİ sədri, həmçinin, MDB Dinlərarası Şurasının həmsədri kimi də bu yöndə fəaliyyətini diqqətə çatdırdı, Dini Liderlərin Ümumdünya Bakı Sammiti çərçivəsində erməni katalikosunu Azərbaycana dəvət etdiklərini, bu qurumun Rəyasət heyətinin iclasında iştirak məqsdəilə özünün də İrəvanda olduğunu bildirdi. Şeyxülislam konstruktiv dialoqa hər zaman hazır olduğunu bəyan etdi.