Dini Qurumlarla İş üzrə Dövlət Komitəsi dini icmlara maliyyə ayrılması məqsədi ilə layihələrin qəbuluna başlayıb.

Ahlibeyt.az-ın islam.az-a istinadən verdiyi xəbərə görə, DQİDK artıq bir müddət əvvəldən dini icma rəhbərlərinə maarifləndirmə, sosial fəaliyyət və s. mövzularda layihə hazırlayıb Komitəyə təqdim etməyi tapşırıbmış. İndi isə artıq icmlardan layihələri qəbul etməyə başlayıb. Proses hələ ki, davam edir. Bütün layihələr qəbul olunduqdan sonra DQİDK-nin xüsusi komissiyası tərəfindən dəyərləndiriləcək və fərqlənənlərə maliyyə yardımı ayrılacaq.

Çox sayda icmaya maliyyə ayrılması gözlənilir. Belə ki, Azərbaycan Respublikasının Prezidenti İlham Əliyevin sərəncamı ilə Azərbaycanda dini icmalara maliyyə yardımı göstərmək üçün Azərbaycan Respublikasının 2014-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Respublikasının Dini Qurumlarla İş üzrə Dövlət Komitəsinə 2,5 milyon (iki milyon beş yüz min) manat ayrılmışdı.

Xatırladaq ki, DQİDK tərəfindən icmalara birbaşa maliyyə yardımı göstərilməsi ilk dəfə 2013-cü ildə başlamışdı. O zaman bu maliyyə, Dini Komitənin daxili vəsaiti hesabına həyata keçirilmişdi. İndi isə artıq bunun üçün ölkə Prezidenti tərəfindən ayrıca maliyyə vəsaiti ayrılıb.