Şeyx Bəndərin dünyanın sabit və hərəkətsiz olması haqqında təsəvvürünə sələfilərin lideri Hacı Qamət Süleymanov münasibət bildirərkən Səudiyyə imamının fikrini dolayısı ilə təsdiqləyib.
Səudiyyə imamı Şeyx Bendər Əl Hayberinin Yer kürəsinin fırlanmadığı haqqında fərziyyəsi Azərbaycan mətbuatının da gündəmini məşğul edib.
QMİ Nəsimi rayonu üzrə nümayəndəsi İlahiyyatçı Hacı Şahin Həsənli Yerin günəş ətrafında fırlanması elmi əsaslarla qəti şəkildə sübuta yetirildiyinə görə, bu cür fərziyyələr “ağlasığmaz və gülünc fikirlər” adlandırdı.
Ahlibeyt.az-ın verdiyi xəbərə görə,İlahiyyatçı Hacı Şahin Həsənli Teleqraf.com-a açıqlamasında bildirib ki, elmin tam təsdiq etdiyi həqiqəti din heç zaman inkar edə bilməz: “İstənilən elmi məsələ ilə bağlı “Quran”dan, yaxud hədislərdən fikir bildirmək vacib deyil. İnsanlar öz ağılları ilə müəyyən elmlərə yiyələnir. Elmi araşdırmalar aparılır və bir həqiqət elmi əsaslarla sübuta yetirilirsə, bunu din dana bilməz. Yəni dinlə elm və ağıl arasında heç bir ziddiyyət ola bilməz. Ona görə də XXI əsrdə yerin sabit olması haqqında fikir çox gülüncdür, bu heç bir dini həqiqətlə üst-üstə düşmür. Əlbəttə ki, Yer fırlanır”.
İlahiyyatçı qeyd edib ki,tarixin müxtəlif mərhələlərində dini elmə qarşı qoyan müxtəlif cərəyanlar olub və bu gün də var. QMİ rəsmisi hazırda səslənən bu fikirləri də həmin cərəyanların təsiri ilə əlaqələndirir: “Bu cərəyanların dinə heç bir aidiyyəti yoxdur”.
Yer kürəsinin hərəkətdə olması haqqında Şahin Həsənli “Quran”ın müxtəlif ayələrində də fikirlər olduğunu dedi: “Dağlara baxıb onları hərəkətsiz görərsən, amma onlar da buludlar kimi hərəkətdədir. Burada Yer Kürəsinin hərəkətdə olması nəzərdə tutulub. Amma belə bir ayə Quranda olmasa belə, Yerin Günəş ətrafında fırlanması elmi həqiqətdir və bunu da din birmənalı şəkildə təsdiq edir”.
