Azərbaycan Prezidenti Administrasiyası ictimai-siyasi şöbəsinin rəhbəri Əli Həsənov Bakıda “The Financial Times” qəzetinin müxbirlərinə geniş müsahibə zamanı radikal İslam təhlükəsi barədə də danışıb.

Ahlibeyt.az-ın Anspress-ə istinadən verdiyi xəbərə görə,Prezident Admnistrasiyasının şöbə rəhbəri müsahibə zamanı vurğulayıb ki, bəzi qüvvələr Azərbaycanı radikal fundamentalistlərin ölkəsi kimi görmək istəyir, bəzi qüvvələr Azərbaycanın dünyəvi inkişaf yolunu dağıtmağa çalışır.

Ə.Həsənov Azərbaycanın Suriyaya döyüşməyə gedən radikallar problemini Qərblə bölüşür. O, 300-ə yaxın azərbaycanlının döyüşmək üçün Suriyaya getdiyini, onların evə qayıtdıqdan sonra təhlükəsizliyə potensial təhlükə yaradacağını deyib.

“Hesab edirəm ki, Qərb ölkələrinin Suriyaya döyüşməyə gedən bir neçə yüz vətəndaşı ora gedən bir neçə yüz azərbaycanlıdan daha az təhlükəlidir” - deyə Əli Həsənov Azərbaycan əhalisinin nisbətən az olduğuna eyhamla bildirib.