Bakıda prezidentin tikdirdiyi ən böyük məscidinin imamı kim olacaq?

Dövlət başçısının ilkin olaraq 10 milyon manat ayırdığı tikinti yalnız bir tikilidən ibarət olmayacaq. 1,3 hektar əraziyə malik məscid kompleksində eyni vaxtda dörd yüzdən çox avtomobilin park olunması üçün dayanacaq, dəstəmazxana və digər zəruri tikililər də nəzərdə tutulub. Və ən mühümü, məsciddə eyni vaxtda 4 min nəfər ibadət edə biləcək. Hazırda məscidin tikintisinin böyük hissəsi başa çatıb, belə demək olarsa son tamamlama işləri gedir.

Bölgənin ən iri ibadət ocağı olacaq yeni məscid həm də Azərbaycan paytaxtının yeni dini simvol abidəsinə çevriləcək. Bu mənada paytaxtın ən iri və yeni məscid kompleksinin imam-camaatının kim olacağı da maraq doğuran suallardandır. Məsələ burasındadır ki, Bakının ən böyük yeni məscidi ölkəyə gələn rəsmi və qeyri-rəsmi qonaqların ziyarət edəcəyi ünvan olacaq, eyni zamanda böyük tutumuna və mərkəzi ibadət evi olduğu üçün bu ibadət evinə rəhbərlik edəcək ruhaninin kimliyi mühüm əhəmiyyət daşıyır. Bu mənada məscidlər həm də axund və imam-camaatları ilə tanınır. Bizə çatan məlumatlara görə, hazırda Bakıda tikilən yeni məscidə kimin axund təyin olunması ilə bağlı qərar olmasa da, Qafqaz Müsəlmanları İdarəsinin ruhanilər arasında məscidə iddiaçılar ortaya çıxıb. Şəhər məscidlərindən, o cümlədən QMİ-də çalışan bəzi mollalar yeni tikilən məscidə göz dikib. Çünki yuxarıda sadaladığımız faktorlar və digər amillər məscidi mollalar üçün cəlbedici edir.

Ancaq gələn bilgilərə görə, QMİ sədri Şeyxülislam Allahşükür Paşazadə hələlik iddiaçıların heç birinə məscidlə bağlı söz verməyib. Bu barədə bizə məlumat verən mənbə bildirir ki, artıq bir neçə molla Şeyxin özü ilə görüşərək, bu barədə arzularını ona bildiriblər. Ancaq tədbirli və uzaqgörən Şeyxülislam bu adamların heç birinə birmənalı cavab verməyib. O da bildirilir ki, Şeyx Bakının ən iri məscidinə təyinatını hökumətlə razılaşdırmalı olduğunu deyir. Eyni zamanda, indidən qabağa düşüb kiməsə vəd verib məsuliyyəti üzərinə götürmür. Ancaq gələn bilgilərə görə, Şeyxülislam məscidə savadlı, sanballı ruhani təyin olunacağını bilir, elə bir ruhani ki, həm cəmiyyətdə tanınsın, həm də savadlı, səviyyəli bir din xadimi olsun. Çünki məscidə elə bir din xadimi olmalıdır ki, orda tezliklə məscidin tutumuna bərabər camaat formalaşa bilsin. Əks halda, Təzə Pir kimi 50-10 adamın cəm olduğu bir məscidə çevrilməsi Şeyx üçün böyük bir uğursuzluq olardı. Təbii ki, bunların yanında təyin olunacaq axundun həm də Şeyxə yaxın olması şərti də var.

Qeyd edək ki, daha əvvəl yeni məscidə axund vəzifəsinə ilahiyyatçı Hacı Şahin Həsənlinin adı hallansa da, sonradan naməlum səbəblərdən bu mövzu gündəmdən çıxıb. QMİ-dəki mənbənin bildirdiyinə görə, Şeyx hökumətlə, xüsusən də yeni müşavir Kamal Abdulla ilə razılaşdırıb bu posta özünə yaxın ruhanilərdən birini gətirməyə çalışır. Ümumiyyətlə, son dövrlərdə Şeyx QMİ-yə gənc və daha savadlı ruhaniləri cəlb edərək idarənin özündə və məscidlərdə işə götürür. Yeni məscidə Şeyxin namizədinin adı hələ çəkilməsə də, bildirilir ki, QMİ sədri özünə yaxın adamı axund təyin etmək istəyir. Mənbə bildirir ki, QMİ sədrinin yeni məscidə öz axund namizədi olsa da, hələlik ehtiyatlılıq göstərərək ad çəkmək istəmir.

Bizə gələn bilgilərə görə, paytaxt sələfiləri də yeni məscidə iddialıdırlar. Belə ki sələfi camaatı 2008-ci ildə bağlanan “Əbu Bəkr” məscidinə əvəz olaraq yeni ibadət evinin onlara verilməsini istəyir. Hətta bununla bağlı əl altından müəyyən “hazırlıqlara” başlanılıb. Hakimiyyətə çıxış imkanı olanlar vasitəsilə yeni məscidin imamlığının onlara verilməsini istədiklərini bildirirlər. Yaxud da ən azından, məsciddə ayrıca camaat namazı qılmaları üçün şərait yaradılmasını istəyirlər. Artıq bir çox icma üzvlərinin məscidin yerləşdiyi ərazidə ev aldığı və ticarət obyektləri icarəyə götürdüyü deyilir. Qeyd edək ki, son illərdə bir neçə ibadət evi - Qaraçuxur, Müşfiqabad və İlahiyyat məscidləri - məhz sələfi camaatının bu taktikası nəticəsində “ələ keçirilib”. Belə ki əvvəlcə kiçik icma olaraq gələrək yerli icmadan sonra ibadət ediblər və tədricən kənardan cəlbetmələr vasitəsilə məsciddə çoxalaraq əsas camaata çevriliblər. Sonuncu dəfə Sumqayıtda sələfi camaatının şəhər cümə məscidinə bu şəkildə yerləşməsi cəhdi yerli dindarlarla qarşıdurmaya səbəb olmuşdu. Yalnız hökumətin müdaxiləsindən sonra vəziyyət sabitləşmişdi.

Mənbə : musavat.com