Bu gün sosial şəbəkələrdə Dini Qurumlarla İş üzrə Dövlət Komitəsinin sədri Mübariz Qurbanlı ilə İlahiyyatçı alim, “Məşədi Dadaş” məscidinin imam-cüməsi Hacı Şahin Həsənli arasında görüş keçirilməsi barədə xəbərlər yayılıb. İstifadəçilər fərqli formada bu görüşə şərh verir, baş vermə səbəblərinə aydınlıq gətirməyə cəhd edirdilər.

Ahlibeyt.az-ın verdiyi məlumata görə İslam.az məsələyə aydınlıq gətirilməsi üçün Hacı Şahin Həsənli ilə əlaqə saxlayıb.

- Belə bir görüş həqiqətən baş tutdu. Ümumilikdə Azərbaycandakı dini sahədəki durum müzakirə olundu. Bizim dini icma əvvəllər də DQİDK ilə sıx əməkdaşlıq edib və bu əməkdaşlığın gələcəkdə də davam etməsi barədə fikir mübadiləsi aparıldı. Komitə sədri bildirdi ki, dövlət bundan sonra da Azərbaycandakı ənənəvi məzhəblərə qayğı göstərəcək və ciddi dəstək verəcək. Eyni zamanda radikal dini cərəyanlar haqqında fikir mübadiləsi apardıq. Qeyd olundu ki, bu sahədə gənclərimizin dini cəhətdən maariflənməsi və düzgün İslamı anlaması üçün din xadimlərinin üzərinə ciddi vəzifələr düşür.