Qafqaz Müsəlmanları İdarəsinin Həcc ziyarətilə bağlı açıqlama yayıb.

Ahlibeyt.az-ın verdiyi xəbərə görə İdarənin mətbuat xdmətinin  məlumatında bildirilir ki, hər il olduğu kimi, bu il də Azərbaycan zəvvarları bir neçə gündən sonra müqəddəs yerlərə Həcc ziyarətinə yola düşəcəklər. İlk reys sentyabrın 23-dən 24-ə keçən gecə, saat 01.40 dəqiqədə həyata keçiriləcək.

Artıq Səudiyyə Ərəbistanında zəvvarlarımızın bütün təşkilati məsələləri həll olunub. Məkkə və Mədinə səfərlərində həmişə olduğu kimi, bina və otellər icarəyə götürülmüş, zəvvarlarımızın nəqliyyat, gündə iki dəfə yeməklə, mehmanxana və binalarda 24 saat ərzində isti çayla təminatı məsələləri həll olunub.

Ziyarətə gediş reysləri yalnız hava yolu ilə Səudiyyə Ərəbistanına məxsus “Nas” milli aviaşirkəti tərəfindən Bakı-Ciddə marşurutu üzrə, qayıdış reysləri isə Azərbaycan Hava Yollarına (AZAL) məxsus təyyarələrlə həyata keçiriləcək.

Gediş 23-28 sentyabr, qayıdış isə 11-15 oktyabr tarixlərinə nəzərdə tutulub. Bu il Həcc ziyarətinə təxminən 3600 zəvvar yola düşəcək. Zəvvarları qrup rəhbərləri və həkim briqadası müşayiət edəcək.