Bu gün Dini Qurumlarla İş üzrə Dövlət Komitəsinin (DQİDK) sədri Mübariz Qurbanlı Quba şəhərində vətəndaşlarla görüşüb.

“Bəzi qruplar Azərbaycanda xırda təriqətləri yaymağa cəhd edir”.

Ahlibeyt.az -ın verdiyi xəbərə görə  Qubada səfərdə olan Azərbaycan Respublikasının Dini Qurumlarla İş üzrə Dövlət Komitəsinin (DQİDK) sədri Mübariz Qurbanlı çıxışında qeyd edib ki;

“Bəzi qruplar Azərbaycanda xırda təriqətləri yaymağa cəhd edir”.

Komitə sədri bu cür cəhdlərin qarşısının qətiyyətlə alındığını bildirib. Onun sözlərinə görə, belə təriqətlərin ölkəmizdə yer tapması, özünü təsdiq etməsi mümkün deyil.

DQİDK sədri Azərbaycandakı ictimai-siyasi həyatdakı sabitliyin dini sahədə də özünü göstərdiyini bildirib. O, ölkədə dini icmalar arasında qarşıdurma ehtimalının belə olmadığını deyib.  M. Qurbanlı Azərbaycanda dini icmalar arasında normal münasibətlər olduğunu vurğulayıb.

Görüşə Quba ilə yanaşı, ölkənin şimal bölgəsinin digər rayonlarından olan sakinlər də qatılıblar.

DQİDK-nın sədri vətəndaşları narahat edən məsələləri dinləyib, irəli sürülən təkliflər barədə birgə fikir mübadiləsi aparılıb. Dindarlar komitə sədri ilə əsasən ibadətgahların, dini icmaların və məscidlərin qeydiyyatı məsələsi barədə söhbət ediblər.

Vətəndaşlardan bir sıra şikayətlərin daxil olduğunu bildirən DQİDK-nın sədri Mübariz Qurbanlı bu məsələlərin tezliklə həll ediləcəyini bildirib.

Komitə sədri şimal regionunda yaşayan din xadimlərinin, həmçinin dini icmaların təşkilatçılığını yüksək qiymətləndirib. Görüşün sonunda vətəndaşlar tərəfindən edilən müraciətlərin həlli istiqamətində tapşırıq və tövsiyələr verilib.