“Vilayət” “Kövsər” və “Muminun” qrupları və bir neçə fərdi aktyorun qatıldığı tamaşa artıq yekunlaşmaq üzrədir.

Ahlibeyt.az-ın İslamazeri-yə istinadən verdiyi xəbərə görə Xanım Zəhra (s.ə.) adına heyətin təşkilatçılığı ilə Xanım Zeynəbin (s.ə.) həyat hekayəsindən bəhs edəcək “Qəm Qəhrəmanı Zeynəb” (s.ə.) adlı tamaşa son məşqlərini edir.

Xanım Zeynəbin (s.ə.) ölüm yatağında olduğu gecə xatırladığı hadisələrdən bəhs edən tamaşa bədii üslubda tarixin səhifələrini özündə əks etdirir. Kərbəla hadisəsi, Şamın xarabalığı, Mədinəyə qayıdan əsirlərin Ümmülbəninlə qarşılaşması və yanan çadırlarda Rüqəyyənin (s.ə.) fəryadını təqdim edən tamaşa gözəl musiqi tərtibatı, səhnə dekorasiyası və məddahların rövzə və mərsiyələri ilə Xanım Zeynəbin (s.ə.) son gecəsini tərənnüm etdirməyə çalışacaqdır.

Açıq havada qurulan tamaşa qaranlıq fəzada mənəvi bir gecənin ülvi duyğuları ilə sizə unudulmaz bir gecəni vəd edir.

Tamaşa  07 İyun 2014-cü il tarixində, saat 22:00-da Nardaranda, ziyarətgahin yaxınlığında qurulacaq “Qəm Qəhrəmanı Zeynəb” (s.ə.) adlı tamaşaya hər kəs dəvətlidir.

Tamaşadan sonra şəhərə avtobusların işləməsi təşkil olunacaqdır