Hacı Şahin Həsənli-İnsanların halal qıdadan istifadə etməsi mühüm məsələdir

“İnsanların halal qidadan istifadə etməsi mühüm məsələdir. Hesab edirəm ki, halallıq və haramlıq prinsipial məsələdir. Mən şəxsən heç bir vəchlə bu məsələdə hansısa səhv addımın atılmasına yol vermərəm. Yəni bu proses hələ başlamasa da, prosesdə iştirak etdiyimiz təqdirdə ciddi şəkildə o məsələləri nəzarətə götürəcəyik”.

Aktual.az xəbər verir ki, bunu Məşədi Dadaş məscidinin imam-camaatı Hacı Şahin Həsənli Qafqaz Müsəlmanları İdarəsi əznində “Halal” kəsimə nəzarət etmək məqsədilə yaradılan komissiya barəsində danışarkən deyib.

Onun sözlərinə görə, QMİ rəhbərliyi Standartlaşdırma, Metrologiya və Patent Komitəsi ilə danışıqlar aparır:

“Hələ ki, danışıqlar gedir, amma onun nəticəsindən asılı olmayaraq QMİ-nin daxilində belə bir komissiya yaradılıb ki, insanlar ruhanilərə müraciət edəndə onlar onu araşdırıb və fikir bildirə bilsinlər. Danışıqlar müsbət nəticə verməsə də, yenə də zəng edib maraqlananlara bu haqda ətraflı bilgi veriləcək”.

Xatırladaq ki, Standartlaşdırma, Metrologiya və Patent Komitəsindən onlara müraciət edən şirkətlərə “Halal qida. Ümumi tələblər” dövlət standartlarına uyğun sertifikat veriləcək. Dövlət Komitəsi tərəfindən həmçinin “Halal” standartına uyğun məhsullar istehsal etməyən, bu standarta uyğun məhsullar istehsal etməyə şəraiti olmayan, standartın alınması ilə bağlı Komitəyə müraciət etməyən və üzərində əsassız olaraq “halal” sözü yazan şirkətlərə və istehsalçılara qarşı reydlər aparılacaq.