Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə Türkiyə Cümhuriyyəti Diyanət İşləri Başkanının müavini prof. dr. Mehmet Əmin Özavşarı və onu müşayiət edən nümayəndə heyəti ilə görüşüb.

İdarənin mətbuat xidmətindən SalamNews-a verilən məlumata görə, nümayəndə heyətinin tərkibində Diyanet Başkanlığı xarici əlaqələr şöbəsinin müdiri prof. dr. Mehmet Paçaçı və Diyanət İşləri Başkanının Quran Mətnlərinin şərhi və Qiraəti qurumunun rəhbəri Hafiz Osman Şahin olub.

Qardaş ölkənin təmsilçiləri Qafqazın mənəvi mərkəzi olaraq dəyərləndirdikləri Azərbaycana səfərə hər zaman böyük önəm verdiklərini bildiriblər.

A.Paşazadənin dini lider olaraq Azərbaycan-Türkiyə mənəvi əlaqələrinin inkişafına verdiyi töhfələri xüsusi vurğulayan qonaqlar QMİ ilə Türkiyə Cümhuriyyəti Diyanət İşləri Başkanlığı arasında əlaqələrin yüksək səviyyəsindən razılıqlarını bildiriblər. Səmimi şəraitdə keçən görüşdə həmin əlaqələrin bundan sonra da qorunub saxlanılması, qardaş xalqlarımızın ümumi mənafeləri naminə daha da inkişaf etdirilməsi istiqamətində görüləcək işlər müzakirə olunub.

Görüşün sonunda xatirə hədiyyələri təqdim olunub.