"Mənəvi Saflığa Dəvət" İctimai Birliyinin 13 yaşı tamam olub.
SalamNews-un məlumatına görə, bu münasibətlə təşkilatın ofisində tədbir keçirilib.

Təşkilatın sədri ilahiyyatçı alim, fəlsəfə doktoru Elşən Mustafaoğlu Avropadan “skype” vasitəsilə tədbirə qoşularaq virtual olaraq təbriklərini iştirakçılara çatdırıb.

Elşən Mustafaoğlunun sözlərinə görə, 13 il bundan əvvəl 2001-ci il aprelin 4-də "Mənəvi Saflığa Dəvət" İctimai Birliyi təsis edilib. Məqsəd vətəndaşlarımızı, xüsusən də gənclərimizi mənəvi saflığa - mənəviyyatlı, sağlam həyat tərzi sürməyə dəvət etmək olub. Respublikada elmin, təhsilin, mədəniyyətin inkişafına yardım etmək, xalqımızın mənəvi dəyərlərini, mədəni irsini, tarixini öyrənmək və təbliğ etmək, bu sahədə elmi tədqiqatlar aparmaq da bizim başlıca vəzifələrimizdəndir. Bu illər ərzində seminarlar, elmi konfranslar, görüşlər, disputlar, kurslar keçirir, məqalələr, bukletlər, kitablar nəşr etdirir, bizimlə həmfikir olan əziz qardaş və bacılarımızla əl-ələ verib xalqımızın mənəvi saflığı uğrunda birgə fəaliyyət göstərməyə çalışırıq.