DQİDK-nın mətbuat xidmətindən Trend-ə verilən məlumata görə, Dövlət Komitəsi Dini Araşdırmalar Mərkəzi ilə birgə Quba şəhərində növbəti istiqamətləndirici təlim kursu təşkil edib. Kursa şimal bölgəsinə daxil olan rayonların (Quba, Qusar, Xaçmaz, Şabran və Siyəzən) dini icma sədrləri, din xadimləri və ilahiyyatçıları qatılıblar.

Təlim kursu radikal dini qrupların və qeyri-ənənəvi təriqətlərin zərərli təbliğatının qarşısının alınması, onlara qarşı effektiv mübarizə aparılması, dini maarifçilik işinin düzgün metodlarla təşkili, gücləndirilməsi və genişləndirilməsi, milli-mənəvi dəyərlərin, ölkədəki tolerantlıq mühitinin qorunub saxlanması, eləcə də dövlət-din münasibətlərini tənzimləyən milli qanunvericilik bazasının geniş və əhatəli şərhi məqsədilə keçirilib.

Qafqaz Müsəlmanları İdarəsinin dəstəyi ilə cəlb olunmuş 40-a yaxın kurs iştirakçısına ölkənin bu sahə üzrə tanınmış mütəxəssisləri "Azərbaycanda dövlət-din münasibətləri: problemlər və onların həlli yolları", "Müstəqillikdən sonra Azərbaycanda din və milli-mənəvi dəyərlər", "Dini radikallığın yaranma səbəbləri və təzahür formaları", "Din xadimlərinin natiqlik qabiliyyəti və motivasiya üsulları", "Məzhəblərarası yaxınlaşma və dinlərarası dialoq prinsipinin əsasları", "Dini radikalizmlə mübarizədə dünya təcrübəsi" və digər aktual mövzularda mühazirələr oxuyublar.

Kursun açılış mərasimində çıxış edən Dövlət Komitəsinin Dini qurumlarla iş üzrə şöbəsinin müdiri Əliheydər Zülfüqarov radikal dini qrupların və qeyri-ənənəvi təriqətlərin zərərli təbliğatının qarşısının alınması, onlara qarşı effektiv mübarizə aparılması və dini maarifçilik işinin düzgün metodlarla təşkili istiqamətində Komitə tərəfindən həyata keçirilən tədbirlərdən danışıb. Ə.Zülfüqarov bildirib ki, qeyd olunan sahədə qarşıya qoyulmuş məqsədlərə çatmaq baxımından ən vacib amillərdən biri də radikal və zərərli dini qruplara qarşı mübarizədə sağlam mövqe nümayiş etdirən din xadimlərinin və nüfuzlu ilahiyyatçıların bu istiqamətdə fəaliyyətlərinin düzgün qurulması və təşkil olunmasıdır.