Qafqaz Müsəlmanları İdarəsinin (QMİ) nəzdində fəaliyyət göstərən Elmi-Dini Şurada tanınmış elm və din xadimlərinin tövsiyə və qərarı ilə son illərdə bir neçə sanballı əsərin akademik tərcümə və nəşri həyata keçirilib.
İdarənin mətbuat xidmətindən SalamNews-a verilən məlumata görə, QMİ tərəfindən Azərbaycan cəmiyyətinin maraq və tələbini nəzərə alaraq, aktuallıq doğuran dini mövzulara dair maarif səciyyəli əsərlərin çapı reallaşdırılır.
QMİ Elmi-Dini Şurasının qərarı ilə çap olunan əsərlər məhz "Qurani-Kərim"in ayələrinə, səhih hədislərə əsaslanan, bütün İslam aləmində tanınan, ehtiramla qəbul olunan, milliyyəti, məzhəb və görüşlərindən asılı olmayaraq əsərləri ümummüsəlman kontekstində nəzərdən keçirilən müəlliflərin əsərləridir.
QMİ əmindir ki, bu və nəşrə hazırlanan digər əsərlər din adından siyasi məqsədlər üçün sui-istifadə edənlərə, dinimizin müqəddəs dəyərləri və amalları ilə bir araya sığmayan ideyaları təbliğ edənlərə, radikallıq və ekstremizm təlqin edənlərə tutarlı cavab ola bilər. Bu əsərlər cəmiyyət daxilində bölücülük, nifaq toxumu səpənlərin, milli, dini, məzhəb müstəvisində qarşıdurma yaratmağa cəhd edən, müxtəlif dini cərəyanları radikal şəkildə təlqin, təbliğ edənlərin, habelə onların məkrli oyunlarına ölkəmizin istər daxilində, istərsə də xaricində havadarlıq edən qüvvələrin səylərini mənəvi müstəvidə zərərsizləşdirmək, əsl həqiqətləri cəmiyyətə çatdırmaq niyyətinə xidmət edəcək.