Qubanın mərkəzi Ərdəbil məscidində rayon ağsaqqaları ilə dindarların görüşü keçirilib.
SalamNews-un verdiyi xəbərə görə, məqsəd dini maarifləndirmənin aparılması və İslamın elmi potensialının yüksəldilməsindən ibarət olub. QMİ-nin şimal bölgəsi üzrə nümayəndəsi Naib Səttərov bildirib ki, məhzəbindən asılı olmayaraq bu gün bölgədə İslamda mövcud olan bütün təriqətlərin vəhdət təşkil etməsi sevindirici amildir. O, bunun dindarlar və ağsaqqaların birgə apardığı maarifləndirmənin nəticəsində əldə olunduğunu deyib.
N.Səttərov din adı altında Suriyaya gedən şəxslərdən də söz açıb və deyib ki, İslamda bir müsəlmanın digər müsəlmanı öldürməklə cənnətə getməsi ağılasığmaz və mümkünsüzdür.
Görüşdə dini radikalizmə qarşı aparılan mübarizədə MTN işçilərinin fəaliyyəti xüsusi qeyd olunub və peşə payramları münasibəri ilə dindarların təbriki səsləndirilib. Sonda şəhidlərin xatirəsinə dualar oxunub.