Qafqaz Müsəlmanları İdarəsinin (QMİ) sədri şeyxülislam Allahşükür Paşazadə Böyük Britaniyanın Azərbaycandakı səfiri İrfan Siddiq ilə görüb.
QMİ-dən SalamNews-a verilən məlumata görə, görüşdə şeyxülislam A.Paşazadə səfirə Azərbaycanda dini icmalar arasında hökm sürən xoş münasibətlər və səmərəli əməkdaşlıq mühiti barədə məlumat verib.
Səfir İ.Siddiq Azərbaycanda müxtəlif dini icmalar arasında müsbət, harmonik münasibətlərin mövcudluğunu yüksək qiymətləndirib. Şeyxülislam A.Paşazadə dünyəvi dövlət olan Azərbaycanda dinin inkişafının, tarixi-mənəvi irsin və ənənəvi dəyərlərin qorunub saxlanılması və inkişaf etdirilməsinin prioritet olmasının, dini icmaların qayğılarına diqqət və ehtiramla yanaşılmasının, tolerantlıq, multikulturalizm ideyalarına sadiqliyin nəticə etibarilə Azərbaycanın beynəlxalq miqyasda nümunəvi məkana çevrilməsini şərtləndirdiyini söyləyib.
Vurğulanıb ki, ölkəmiz bu sahədə bir çox uğurlu tədbirlərə ev sahibliyi etmişdir və gələcəkdə də belə tədbirlərin keçirilməsi nəzərdə tutulur. Şeyxülislam Böyük Britaniyadan olan din xadimlərini də həmin tədbirlərdə iştiraka dəvət edib. A.Paşazadə, həmçinin QMİ-nin dünyanın bir çox dini mərkəzləri ilə yaxından əlaqə saxladığını diqqətə çatdırıb. Sonda səfirə QMİ-nin fəaliyyətini əks etdirən kitab və albom, habelə xatirə hədiyyəsi təqdim edilib.
