Azərbaycan Respublikasının Xarici İşlər Nazirliyinin Mətbuat xidməti idarəsinin rəisi L.Abdullayeva yerli KİV-in ABŞ Dövlət katibi Antoni Blinkenin 24 avqust tarixli mətbuat bəyanatının şərh edilməsinə dair sorğusunu cavablandırıb.

Ahlibeyt.az xəbər verir ki, bu barədə Azərbaycan XİN-n məlumatında bildirilib.

Amerika Birləşmiş Ştatlarının dövlət katibi Antoni Blinkenin Qafqaz danışıqları üzrə baş məsləhətçi vəzifəsinə Filip Rikerin təyin olunmasına dair mətbuat bəyanatında bölgədəki post-münaqişə reallığından uzaq yanaşmanın sərgilənməsi təəccüb doğurur.

Minsk Qrupu ilə bağlı Azərbaycanın mövqeyi ən yüksək səviyyədə dəfələrlə və aydın şəkildə ifadə olunub.

Faktiki olaraq fəaliyyət göstərməyən Minsk Qrupunun “reanimasiya” edilməsi cəhdləri ABŞ-ın Azərbaycan-Ermənistan münasibətlərinin normallaşması prosesindən uzaqlaşması ilə nəticələnə bilər.

Qarabağ münaqişəsi həll olunub və Qarabağ Azərbaycanın ayrılmaz tərkib hissəsidir. Beynəlxalq ictimaiyyət, o cümlədən tərəfdaşlarımız anlamalıdır ki, Azərbaycan Ermənistan münasibətlərinin normallaşması üzrə danışıqların Qarabağ məsələsi ilə əlaqələndirilməsi heç də normallaşmaya xidmət etmir.

Qeyd edək ki, bir neçə gün əvvəl  ABŞ dövlət katibi Entoni Blinken açıqlama verərək bildirib ki, səfir Filip Rikeri Qafqazda danışıqlar üzrə baş məsləhətçi və Minsk Qrupunun həmsədri təyin edilib.