Yəməndə ötən ilin martından (münaqişənin gərginləşməsi) indiyədək 3218 mülki şəxs ölüb, 5778-si xəsarət alıb.

Ahlibeyt.az-ın Salamnews- a istinadən verdiyi xəbərə görə, bu məlumatlar BMT-nin insan hüquqları üzrə ali komissarı Zeyda Raada əl-Hüseynin bəyanatında təqdim edilib.

Ali komissar martın 15-də əl-Hamis şəhərindəki bazara Səudiyyə Ərəbistanının rəhbərlik etdiyi koalisiya tərəfindən endirilən və 106 dinc sakinin həyatına son qoyan aviazərbələri qətiyyətlə pisləyib: “Yəmənin şimal-qərbindəki əl-Hamis bazarına iki aviazərbənin endirilməsi nəticəsində baş verən qırğın bir il əvvəl - münaqişənin başlandığı vaxtdan indiyədək ölüm sayına görə ən ağır hadisələrdən biridir.”

Əl-Hüseyn koalisiya qüvvələrini “oxşar hadisələrin sayının artmasının qarşısını almaq üçün effektiv fəaliyyət göstərməyə, şəffaf və müstəqil araşdırma aparmağa" çağırıb və vurğulayıb ki, əl-Hamisdəki hadisəyə Beynəlxalq Cinayət Komissiyası tərəfindən baxıla bilər.

O əlavə edib ki, döyüşən tərəflər “hər zaman hərbi hədəflər və mülki şəxslər arasında fərq qoymağa məcburdurlar”.