Yaxın Şərq və Cənubi Asiyada radikallardan qorxu artır.

Ahlibeyt.az-ın SalamNews-a istinadən verdiyi xəbərə görə bu barədə müvafiq araşdırma aparan “Pew Research Center” araşdırma mərkəzi məlumat verib.

Livanda rəyi soruşulanların 92%-i radikalların təsirinin artmasından qorxur; bu, 2013-cü ildəkindən 11% çoxdur. Maraqlıdır ki, livanlıların ictimai rəyinin bu nəticəsi praktiki olaraq şiə, sünni və xristianlar arasında bərabər paylanıb.

İordaniyada respondentlərin 62%-i radikalmeylli fanatiklərdən qorxur. Bu isə 2012-ci ilə nisbətən 13% çoxdur.

Oxşar nəticələr Asiya ölkələrində də əldə edilib. Belə ki, Banqladeşdə rəyi soruşulanların 69%-i, Pakistanda 66%-i, Malayziyada isə 63 %-i radikallardan qorxur. Böyük müsəlman dövlətlərindən biri sayılan İndoneziyada sorğuda iştirak edənlərin 40%-i ekstremizmlə bağlı narahatlığını ifadə edib.

Nigeriyada respondentlərin 79%-i “Boko-Haram” hərəkatının fəaliyyəti ilə razılaşmadığını bildirib, 59% pakistanlı isə “Taliban” hərəkatına qarşıdır. Fələstində rəyi soruşulanların 53%-i HƏMAS hərəkatına qarşı çıxış edir, Qəzza zolağında isə bu nisbət 63%-dir.

Bildirək ki, fələstinlilərin 46%-i şəhid kəməri bağlayıb törədənlərin fəaliyyətinə bəraət qazandırır. Lakin bu, 2007-ci illə müqayisədə nəzərəçarpacaq dərəcədə aşağı göstəricidir. Belə ki, həmin vaxt belə insanlar 70% təşkil edirdi.

Qeyd edək ki, araşdırma “İraq və Şamda İslam Dövləti” (DAİŞ) terror təşkilatının İraqa hücumuna qədər, yəni 2014-cü il aprelin 10-dan mayın 25-dək aparılıb. Sorğuda 14.2 min nəfər iştirak edib.